Иске Балтачта ятим балаларга фатир ачкычлары тапшырылды

30 Июль, 2020 - 12:00

Бүген, 30 июль  көнне, Иске Балтачта, "Ятим балаларны һәм ата-ана тәрбиясеннән мәхрүм калган балаларны социаль яклау буенча өстәмә гарантияләр турында" законга ярашлы, ике ятим балага фатир ачкычлары тапшырылды.

Бу күңелле вакыйга бүген, изге Корбан бәйрәме алдыннан  тормышка ашырылды. Район Хакимияте башлыгы Илгиз Субушев балаларга  фатир ачкычларын шәхсән үзе тапшырды һәм әлеге фатирларның алар өчен туган йорты булачагына ышаныч белдерде.

«Балалар! Бүген сезнең өчен мөһим вакыйга –  дип мөрәҗәгать итте район Хакимияте башлыгы Илгиз Субушев яшьләргә. – Сез олы тормышка аяк басасыз, һәм дәүләт  сезнең  тормышны яхшырту юнәлешендә  ярдәм итү өчен чаралар күрә. Фатир-ул гаилә төзү, тотрыклы эш һәм тулы канлы тормыш өчен нигез. Балтач районында яшьләр монда калсын өчен күп эшләнә. Сез дә үз районыгызда белем һәм талантларыгызны кулланырсыз һәм илебезнең лаеклы гражданнары булырсыз дип ышанам! Сезгә олы тормышыгызда уңышлар телим!»,--диде Илгиз Субушев, фатир ачкычлары тапшыру тантанасында

Үз чиратында, яңа йортка күчүчеләр район  Хакимиятенә һәм әлеге вакыйгага катнашы булган башка кешеләргә рәхмәт сүзләрен җиткерделәр.