Балтач гөмбәчеләре урманга бер баруда центнердан артык… әтәч гөмбәсе (лисичка) җыйган!

Иске Балтач авылында яшәүче уңган, булган гөмбәче гаилә шушы көннәрдә урманга юллангач, чын мәгънәсендә могҗизага юлыга: әтәч гөмбәсе аланына барып чыга.

Өч кешенең дүрт сәгать эчендә җыйган утыз чиләк (!) гөмбәсе үлчәүгә салгач центнердан артык тарта.

—Урман хәзинәсе үзебезгә дә, туганнарга, якыннарга да җитте. Гөмбәне урманның эченнән түгел, урман авызыннан, ачыклыктан җыйдык, — ди гөмбәче гаилә башлыгы Ленар Рәшит улы.

Кызыклы хәбәрләре белән уртаклашканнары өчен гөмбәчеләргә рәхмәт белдерәбез һәм җыйган урман сыйлары хәерле ризыкларына язсын, дигән теләктә калабыз.

Ә сез, дуслар, ялларыгызны ничек үткәрдегез?