Балтач төбәгендә октябрь аена хас һава шартлары тора

Балтач төбәгендә алдагы көннәрдә салкынча, тотрыксыз һава шартлары көтелә.

Балтач төбәгендә алдагы көннәрдә һава шартлары җылы белән сөендермәячәк. Өстәвенә, явым-төшем ихтималы да саклана.  Күп төбәкләрдә  инде һава температурасы антирекорды теркәлгән.  Мәсәлән, Мәскәүдә 1948 елдан башлап мондый салкын август булмаган.

Безнең төбәктә тагын да салкынрак.  Гисметео сайты мәгълүматларына караганда чәршәмбе, ягъни  7 август көнне һава температурасы көндез +14 градустан  югары күтәрелмәячәк.  Бу сентябрь ахыры—октябрь ае башындагы һава температурасы нормасына туры килә. 8 августта бераз җылыта. Ә 9 август көнне һава температурасы  климатик нормаларга кайта. 12 августка кадәр көндез һава температурасы +21, +17 градус чикләрендә булачак.   Циклоник һава  циркуляциясе һава шартларын бу көннәрдә тотрыксыз итә. Вакыты белән яңгыр явуы ихтимал.

Мондый һава шартлары үсемлекчелек тармагы өчен яхшы түгел. Чөнки икмәк культуралары уңышы өлгерүе тоткарлана. Мәсәлән, башаклардагы бодай бөртекләренә өлгерү өчен +21 градустан да түбән булмаган җылылык кирәк. Ә дөге мондый температурада, өлгерү түгел, үсә дә алмый.